Ֆրանսիայի արտաքին գործերի նախարար Ստեֆան Սեժուրնեն փետրվարի 9-ին, Փարիզում հայ գործընկերոջ՝ Արարատ Միրզոյանի հետ հանդիպման ժամանակ հայտնել է Հայաստանի ինքնիշխանությանը եւ կենսակայունությանն անվերապահորեն, լիակատար եւ անսասան կերպով աջակցելու մասին, երկու երկրների ԱԳ ղեկավարների հանդիպումից հետո նշվել է Ֆրանսիայի ԱԳՆ հայտարարությունում։
Նախարարները քննարկել են համագործակցության երկկողմ նախագծերի ամրապնդման առաջնահերթությունները, մասնավորապես՝ ենթակառուցվածքային նախագծերի զարգացումը տրանսպորտի, էներգետիկայի եւ ջրային ռեսուրսների ոլորտներում։
Կողմերը նաեւ զրուցել են Եվրամիության եւ Հայաստանի միջեւ հարաբերությունների ամրապնդման մասին։
«Բացի այդ, Ֆրանսիան շարունակում է ավելացնել հումանիտար աջակցությունը Հայաստանին եւ Լեռնային Ղարաբաղի փախստականներին. 2023թ. օգնության ծավալը կազմել է 29 մլն եվրո, ինչը թույլ կտա աջակցել ՀԿ-ների, ԿԽՄԿ-ի, Հայկական Կարմիր խաչի եւ ՄԱԿ խոցելի անձանց օգնության գծով գործակալությունների գործունեությանը»,- նշվել է հաղորդագրությունում։
Նշվել է նաեւ, որ ՀՀ եւ Ֆրանսիայի արտաքին գործերի նախարարները քննարկել են Հայաստանի եւ Ադրբեջանի միջեւ հարաբերությունների կարգավորման հարցը։
«Նախարարը հաստատել է, որ Ֆրանսիան աջակցում է Եվրամիության եւ Միացյալ Նահանգների միջնորդական ջանքերին։ Չի կարող լինել արդար եւ ամուր խաղաղություն՝ առանց միջազգային իրավունքի, ինքնիշխանության եւ երկու պետությունների միջեւ սահմանների անխախտելիության հարգման»,- ընդգծվել է Ֆրանսիայի ԱԳՆ հայտարարությունում։
