Հայաստանն ու Ադրբեջանը դեռ համաձայնության չեն եկել խաղաղ համաձայնագրի կնքման մի շարք առանցքային հարցերի շուրջ, այդ թվում՝ համաձայնություն չկա, թե որ թվականի քարտեզի հիման վրա պետք է տեղի ունենա հետագա սահմանազատման գործընթացը։ Այս մասին ԱԺ-ում լրագրողների հետ ճեպազրույցում ասաց ԱԳ փոխնախարար Վահան Կոստանյանը։

«Ցավոք սրտի, կողմերի դիրքորոշումները բավականին հեռու են իրարից, բայց աշխատանքները շարունակվում են»,-նշեց Կոստանյանը։

ՀՀ փոխարտգործնախարարի խոսքով, «Ադրբեջանի կողմից Հայաստանի հետ սահմանին և Լեռնային Ղարաբաղում լարվածության աճը չի նպաստում տարածաշրջանում խաղաղության և կայունության հաստատմանը և կասկածի տակ է դնում Բաքվի հայտարարությունները խաղաղության հաստատման շահագրգռվածության մասին»։