Ըստ օդում կախված լուրերի, նաև մամուլում բազմաթիվ հրապարակումների համաձայն, թմրանյութերի տարածումն ունի առերևույթ որոշակի հովանավորչություն, իշխանական որոշակի լծակներ, կամ այդպիսին ներկայացող անձանց կողմից: Այս մասին այսօր՝ ապրիլի 25-ին, ԱԺ արտահերթ նիստում հայտարարեց «Հայաստան» խմբակցության պատգամավոր Արծվիկ Մինասյան։
Ըստ նրա, այս տեսակետից համակարգային պայքարը պետք է վերաբերի բոլոր ուղղություններին և բոլոր անձանց՝ անկախ զբաղեցրած դիրքից, դերից, ունեցած հնարավորությունից։ «Անչափահասների շրջանում, դպրոցներում, նաև զինված ուժերում, այն բոլոր ոլորտներում, որոնք մեր անվտանգության համակարգերի հետ են կապված, պատիժն ու պատասխանատվությունը շատ կոշտ պետք է լինի»,- նշեց Արծվիկ Մինասյանը։
ԱԺ փոխնախագահ Հակոբ Արշակյանն արձագանքելով՝ առաջարկեց, որ եթե նման փաստեր կան, Արծվիկ Մինասյանը դիմի դատախազություն, ինքն էլ իր կողմից կաջակցի այդ հարցում։
Այնուհետև ԱԺ ամբիոնից ՔՊ-ական Վահագն Ալեքսանյանը խնդրանքով դիմեց Մինասյանին. «Ձեր իսկ կողմից, կամ ձեզ իսկ պատկանող մամուլի կողմից օդում կախված լուրերին այս ամբիոնից հղում մի արեք, թե չէ կարող է գանք էստեղ ու հարցնենք, թե կոնկրետ ով է ձեր մոտ նստած մարդկանցից վերջերս հրաժարվել արյան անալիզ տալուց»:
