Ապրիլի 4-ին Երևանի Հակոբ Պարոնյանի անվան երաժշտական կոմեդիայի թատրոնում  տեղի ունեցավ Հարսանեկան պինգ պոնգ կատակերգական ներկայացումը:

Ներկայացման ռեժիսորն Արշո Հարությունյանն է: Դերերում են Գոռ Հակոբյանը, Իննա Խոջամիրյանը, Լևոն Հախվերդյանը, Անի Խաչիկյանը և Մանե Մխոյանը:

 Ներկայացումը դավաճանության, չկայացած հարսանիքի ու առաջին հայացքից սիրո մասին է:

 Տիգրանը, ով  պետք է ամուսնանա, առավոտյան արթնանում է և հյուրանոցի այն համարում, որն ամրագրել էր իր հարսանիքի համար, տեսնում , որ անծանոթ աղջկա հետ է գիշերն անցկացրել: Շուտով հյուրանոցի համար է գալիս իր մտերիմ ընկերը՝ Ռոբերտը: Եվ որպեսզի հարսանիքը չխափանվի, Տիգրանը խնդրում է Ռոբերտին, որպեսզի իր հարսնացուի մոտ խոստովանի, որ հյուրանոցի այդ աղջիկն իր ընկերուհին է:

 Նա դեռ պետք է պարզեր, որ այդ աղջիկն իսկապես իր ընկերուհին է եղել: Սակայն իսկական պինգ պոնգը սկսվում է, երբ պարզվում է, որ Ռոբերտն ու Տիգրանի հարսնացուն՝ Էվան, իրար են սիրում և նախորդ գիշերնբ իրար հետ են անցկացրել՝ կողքի սենյակում:

Պրոդյուսեր Արման Միտոյանը ներկայացումից հետո լրագրողների հետ կիսվեց տպավորություններով և  սպասելիքներով.  «Միշտ պրեմիերաներն ավելի լարված են լինում: Մտահղացումը ծնվել է մյուս պրոդյուսերի՝  իմ լավ ընկեր Տիգրան Վիրաբյանի մոտ, ինչպես միշտ լավ մտահղացումներին իր մոտ են ծնվում(ծիծաղում է) և երկու տարվա մեջ ընտրվեց  կայացավ պրեմիերան: Երկար ժամանակ զբաղված էինք սցենարի ընտրությամբ, բայց երբ որոշվեց, թե ինչ գործ ենք ուզում բեմ բարձրացնել, արդեն Արշո Հարությունյանն անցավ իր գործին»:

 Նա նաև նշեց, որ թիմն ի սկզբանե ընտրված էր, միայն մնում էր պարզել, թե ինչ պետք է անեն, ինչ գործ պետք է ներկայացնեն, որ համահունչ լինի թիմին:

Դերասանուհի Անի Խաչիկյանը, ով ներկայացման մեջ մարմնավորում է Լառային, կիսվեց իր դերի մանրամասներով. «Աղջիկ է, ով հայտնվել է մի իրավիճակում, ոչ իր մեղքով, ոչ իր կամքով ու ինչքան էլ, որ որոշակի մեղքի բաժին ունի, այնուամենայնիվ փորձում է ոչ ոքի իր հետ չքաշի այդ ջրհորը: Ու ընդհանուր  ամբողջ ներկայացումն այնքան պինգ պոնգ է , որ առանց մեկս մյուսի խաղի, չէր հաջողվի»:

Գոռ Հարությունյանը, ով մարմնավորում է Ռոբերտին, նկատում է, որ ներկայացման ժամանակ մի քանի կիքսեր են թույլատրվել և դա բնական է, բայց  կարծում է, որ հաջորդին այլևս չեն լինի. «6 ամիս շարունակ ամեն երեկո մենք փորձեր ենք արել: Կարծում եմ՝ ամեն ինչի տակից կարողացանք պատվով դուրս գալ: Առաջնային էր, որ հանդիսատեսն ամբողջությամբ զգար այդ ամենը»:

Հարցին, թե հնարավոր է այսուհետ նրան տեսնել թատրոնում, Գոռ Հարությունյանը նշեց, որ կոմերցիոն համագործակցությամբ անպայման, սակայն մշտական աշխատանքով՝ դժվար:

 Ներկայացման պրոդյուսեր, մտահղացման հեղինակ Տիգրան Վիրաբյանը նշեց, որ շատ լավ կոլեկտիվ  են հավաքել և այս ներկայացումն էլ այդ հրաշալի համագործակցության արդյունքն էր. Արմանի հետ անընդհատ քննարկում էինք, թե ինչ ներկայացում կարող ենք ստեղծել: Ի դեպ ՝ դերասանական խմբում իմ սիրելի դերասաններն են: Փորձերի ընթացքում հասկացանք, որ այս դերասանական խումբը կամաց-կամաց վերածվում է լավ ընտանիքի և այսօր  կարողացան նրանք ապացուցել, որ  իրենք շատ սիրում են իրենց աշխատանքը: եվ հանդիսատեսի այսօրվա բուռն արձագանքը գալիս է ապացուցելու, որ մենք չենք սխալվել և՛ պիեսի ընտրության, և՛ դերասանների ընտրության  հարցում: Սա դեռ պրեմիերան է, ներկայացումը վստահ եմ՝ երկար կյանք է ունենալու»:

 Վիրաբյանը նշեց, որ քննարկվում է ներկայացման աշխարհագրությունը մեծացնելու հարցը: Հրավերներ  են ստացել  ներկայացումը ԱՄՆ և այլ երկրներ  տանել: