Ազատազրկման վայրերում պետք է ներդրվեն նոր չափորոշիչներ։ Այս մասին Ազգային ժողովի նիստում, «Կալանավորված եւ ձերբակալված անձանց պահման մասին» օրենքում լրացումներ կատարելու մասին օրինագծի քննարկման ժամանակ, հունվարի 16-ին ասել է ՀՀ ներքին գործերի փոխնախարար Արփինե Սարգսյանը։
Նրա խոսքով՝ ազատազրկման վայրերում գրանցվել են բազմաթիվ խնդիրներ, եւ այս լրացումներն ուղղված են դրանց շուտափույթ լուծմանը։ «Հանրային դիտորդների խումբը, ինչպես նաեւ Մարդու իրավունքների պաշտպանի գրասենյակը գրանցել են մի շարք խնդիրներ, որոնցից են՝ թեքահարթակների, առանձին բաղնիքների ու զուգարանների բացակայությունը, որակյալ լուսավորությունը։ Կառավարության որոշումը լավ առիթ է կալանավորվածների պահման նոր չափորոշիչների սահմանման համար։ Սա կարեւոր ուղղություն է ոստիկանության ոլորտում իրականացվող բարեփոխումների շրջանակում»,- ասել է Սարգսյանը։
Փոխնախարարն ընդգծել է. օրենքի լրացումները ենթադրում են, մասնավորապես, նոր չափորոշիչների սահմանում կառույցների, ինչպես նաեւ ազատազրկման վայրերի համար։
Աղբյուրը՝ News.am
