ՄԱԿ-ի Անվտանգության խորհուրդը պետք է արձագանքի Ղարաբաղում ստեղծված իրավիճակին եւ երկարաժամկետ միջազգային երաշխիքներ ապահովի Ղարաբաղի համար։ Այս մասին դեկտեմբերի 15-ին լրագրողների հետ զրույցում ասաց Ղարաբաղի պետական նախարարի խորհրդական Արտակ Բեգլարյանը։
Նրա խոսքով՝ ՄԱԿ-ը պետք է լուծում տա նաեւ կարճաժամկետ եւ երկարաժամկետ խնդիրներին, այդ թվում՝ անվտանգության ոլորտում եւ խնդրի լիարժեք կարգավորման հարցում։
Նա կոչ արեց ՄԱԿ-ին ընդունել բանաձեւ՝ գործիքակազմով խաղաղապահ առաքելության մանդատ տալու համար, եւ որ ՄԱԿ-ի Անվտանգության խորհրդի բոլոր մշտական անդամները լրացուցիչ հստակ քաղաքական պարտավորություններ ստանձնեն:
«Բացի այդ, ՄԱԿ-ի կազմակերպությունները պետք է նաեւ մուտք ունենան Ղարաբաղ եւ բացեն այստեղ իրենց գրասենյակները, ինչի մասին նշված է նաեւ 2020 թվականի նոյեմբերի 9-ի հայտարարությունում, մասնավորապես փախստականների հարցով ՄԱԿ-ի գերագույկն հանձնակատարի մասով։ Տարբեր ուղղություններով աշխատանքներ պետք է տարվեն, քաղաքական կամք է միայն պետք», – նկատեց Բեգլարյանը։
Նա ՄԱԿ-ի Մարդու իրավունքների գերագույն հանձնակատարին կոչ արեց արձագանքել ստեղծված իրավիճակին, քանի որ խոսքը հումանիտար աղետի մասին է, որի առջեւ կանգնած է Ղարաբաղի ժողովուրդը։
Պաշտոնյան ասաց, որ կապի մեջ է նաեւ Սփյուռքի կառույցների՝ Հայ Դատի գրասենյակների հետ, զրույցներ է ունեցել Սփյուռքի ազդեցիկ ներկայացուցիչների հետ։
«Սփյուռքն արդեն լոբբիստական աշխատանք է տանում, աշխարհի տարբեր երկրներում գործողություններ են նախատեսվում։ Նախ պետք է հստակ գնահատական հնչի, եւ ուրախալի է, որ որոշ երկրներ արդեն հասցեական գնահատականներ են տվել՝ հայտարարելով ստեղծված իրավիճակի անթույլատրելիության մասին»,- ընդգծեց Արտակ Բեգլարյանը։
