Կորոնավիրուսի հետեւանքով մեկուսացված քաղաքացիների կացարանի եւ սննդի կազմակերպման վերաբերյալ հարուցված քրեական գործի շրջանակներում ես անհրաժեշտության դեպքում օրենքով նախատեսված պատասխանատվություն կկրեմ։ Այս մասին հունիսի 23-ին լրագրողների հետ զրույցում ասաց էկոնոմիկայի նախարար Վահան Քերոբյանը։
Նա կոչ արեց սպասել համապատասխան կառույցների աշխատանքի արդյունքներին։ «Պայմանագրերը ստորագրվել են մինչ իմ նախարար դառնալը։ Որոշ ժամանակ անց այս գործառույթը փոխանցվել է առողջապահության նախարարությանը»,- հավելեց նախարարը։ Քերոբյանը վստահեցրեց, որ մեղավորները կպատժվեն։
Հիշեցնենք, որ, ըստ իրավապահ մարմինների, էկոնոմիկայի նախարարության պաշտոնյաները պետությանը պատճառել են ավելի քան 20 միլիոն դրամի (մոտ 50 000 դոլար - խմբ.) չափով ծանր վնասներ՝ կորոնավիրուսի պատճառով մեկուսացված քաղաքացիների կացարանն ու սնունդը կազմակերպելու միջոցառումների շրջանակում։ Հարուցվել է քրեական գործ։
