«Եթե Հայաստանը կարգավիճակ է պահանջելու Լեռնային Ղարաբաղի հայերի համար, ինչու՞ չպետք է արևմտյան Զանգեզուրում ադրբեջանցիների համար կարգավիճակ պահանջենք։ Այս տարածքն ամբողջությամբ ադրբեջանցիներով էր բնակեցված»,- ասել է Ալիևը Բաքվի IX գլոբալ ֆորումի բացման ժամանակ, գրում է Minval-ը։

Քաղաքագետ Տիգրան Գրիգորյանը Vesti.am-ի հետ զրույցում, մեկնաբանելով թշնամի երկրի ղեկավարի միտքը, ասաց․ «Ալիևը պատերազմի ավարտից հետո անընդհատ օգտագործում է Հայաստանի նկատմամբ տարծքային պահանջները, որպեսզի չեզոքացնի Լեռնային ղարաբաղի հարցում Հայաստանի կողմից պահանջները։ Սա նորություն չէ»։

Դիտարկմանը թե արդյո՞ք Հայաստանի ղեկավարի իջեցրած նշաձողի պայմաններում Ալիևը բարձարացնում է իրենց նշաձողը՝  Գրիգորյանը չհամաձայնեց․ «Սա լավ ցույց է տալիս, որ Հայաստանի կողմից վարվող այս քաղաքականությունը որևէ էական արդյունք չի տվել։ Ադրբեջանն ավելի կառուցողական չի դարձել և պատրաստ չէ նույնիսկ այդ իջեցված նշաձողի տրամաբանությամբ ինչ-որ բան քննարկել։ Ադրբեջանը մաքսիմալիստական նպատակներ ունի և ցանկանում է, որ Հայաստանն ընդունի այդ նպատակները կամ պահանջները։ Պարզ է նաև, որ Ադրբեջանը շարունակելու է խոսել սպառնալիքի լեզվով, որպեսզի փորձի հասնել այդ նպատակներին»,- եզրափակեց քաղաքագետ Տիգրան Գրիգորյանը։