Փոքրիկ, բայց մեծ նպատակներով․այսպիսին է մեր այսօրվա զրուցակիցը՝11 ամյա Էմմի Հակոբյանը։

Էմմին ապրում է ԱՄՆ-ում, և հաճախակի է ներկա գտնվում հայտնի ամերիկյան մեգաաստղերի շոուներին, սակայն ողջ էությամբ ձգտում է հայ մնալ։

Փոքրիկ երգչուհին, չնայած տարիքին, հասցրել է լուրջ ճանապարհ անցնել երաժշտական ասպարեզում, որում նրան օգնում է հայրը, ով նաև  որպես պրոդյուսեր է ներկայանում։

Էմմին տիրապետում է նաև երաժշտական գործիքների․սիրում է բաս կիթառ, բայց նվագում է դաշնամուր և հարվածային գործիքներ։

Երաժշտական ոճերում ևս սահմանափակում չունի։ Երգում է ջազզ, ռոք, սոուլ, հիփ-հոփ, դասական, ժողովրդական և այլ ոճերում։

Ծրագրերի մասին խոսելով՝ փոքրիկ  Էմմին չցանկացավ  բացել փակագծերը, բայց նշեց, որ մինչև տարվա վերջ 2 մեծ նախագիծ է հանձնելու տեսահոլովակի տեսքով։

«Եվս 2 նախագիծ ամերիկյան շուոբիզնեսի համար ունեմ։ Հայրիկիս օգնությամբ պլանավորում ենք նաև իմ առաջին մենահամերգը Երևանում։  

Երգացանկումս կա մոտ 5 տասնյակ երգ։  Ունեմ  նաև մոտ 20 պատվիրված երգ տարբեր ոճերում։ Այս բոլորը, իհարկե, միանգամից չի ներկայացվի, սա իմ առաջիկա 3 տավա ծրագիրն է»,- ասաց նա։

Պատրաստվում է մասնակցել նաև ամերիկյան կինոքասթինգների։ Արդեն առաջարկներ կան։ Ամռան վերջում պարզ կդառնա, թե որ ֆիլմում ինչ դեր է խաղալու։ Եվրոպայում ևս կմասնակցի մի մի քանի փառատոնի:

«Երաժշտական դպրոցից բացի ինձ շատ են օգնում հայրիկիս ընկերները, ովքեր անվանի երաժիշտներ են։ Վերջին երգս « Բարի գիշեր» երգն է, որն առաջին  անգամ կատարել է Սյուզան Մարգարյանը, իսկ ես փորձել եմ յուրովի ներկայացնել, որի համար շնորհակալ եմ մաէստրո Արմեն Մարտիրոսյանին։ Համագործակցում եմ նաև Կարեն Սևակի, Արամ Ավագյանի և այլ  երաժիշտների հետ»,-նշեց երգչուհին։

Փոքրիկ Էմմիի նպատակն է դառնալ հայտնի և սիված արվեստագետ, ով հպարտությամբ կներկայացնի իր հայրենիքը։