Այսօր կայացել է ապրիլյան պատերազմի պատճառով հետաձգված «Միսս Հայք 2016» հաշմանդամություն ունեցող կանանց համահայկական գեղեցկության մրցույթի եզրափակիչ փուլը և մրցանակաբաշխությունը: Այն անց է կացվել Կոմիտասի անվ. կամերային երաժշտության տան դահլիճում:
«Ունիսոն» հասարակական կազմակերպության նախաձեռնած այս միջոցառումը նվիրվել է հայ ժողովրդի մայիսյան եռատոնին:
Առաջին տեղը գրավել է Էլեն Խաչատրյանը՝ Երևանից: «Միսս Հայք»-ն ունի լսողության հետ կապված խնդիր:
Երկրորդ տեղը՝ «Վիցե Միսս Հայք» անվանակարգը, զբաղեցրել է Ռուզաննա Կարապետյանը՝ կրկին Երևանից: Նա նույնպես ունի լսողության հետ կապված խնդիր:
Երրորդ տեղին՝ «Միսս համակրանք» անվանակարգով արժանացել է Արփինե Հարությունյանը՝ Լեռնային Ղարաբաղի Հանրապետությունից: Նա տեղաշարժվում է սայլակով:
Իսկ չորրորդ՝ «Միսս Ունիսոն» անվանակարգում, հաղթող է ճանաչվել Ֆենյա Պողոսյաննը՝ Վայոց ձորի Ռինդ գյուղից: Նա լսողության խնդիր ունի:
Եղել են նաև 6 խրախուսական մրցանակներ:
«Միսս Հայք 2016»-ին մասնակցության հայտ են ներկայացրած եղել 16 տարեկանը լրացած 44 գեղեցկուհիներ Երևանից, Հայաստանի բոլոր մարզերից և ԼՂՀ-ից, ինչպես նաև 1 մասնակից Ռուսաստանից: Այս տարի առաջին անգամ վերին տարիքային շեմ չի սահմանվել: Նորամուծությունների շարքում էր նաև նախընտրական` ֆեյսբուքյան փուլը։ ՖԲ օգտատերերի հավանումների քանակով ընտրվել են եզրափակիչ փուլի երեք մասնակիցները: Ընդհանուր առմամբ, եզրափակիչ փուլ էր անցել 10 գեղեցկուհի:
Ժյուրիի կազմում էին ընդգրկվել հաղորդավար Եգոր Գլումովը, հեռուստամեկնաբան Գայանե Փայտյանը, գրաֆիկ-դիզայներ Մուշեղ Գարուկյանը:
Ներկայացնում ենք Vesti.am-ի ֆոտոշարքը մրցույթից:
Vesti.am
