Հայաստանի հունահռոմեական ոճի ըմբշամարտի հավաքականի անդամ, աշխարհի, Եվրոպայի չեմպիոն, Օլիմպիական խաղերի արծաթե մեդալակիր Արսեն Ջուլֆալակյանը Դանիայում անցկացվող Thor Masters-ում ոսկե մեդալ է նվաճել։ Նա Instagram–ի իր էջում լուսանկար է հրապարակել և իր ուրախությունը փոխանցել հետևորդներին։
«Կրկին հանգստյան օր, կրկին ըմբշամարտ և կրկին հաղթանակ։ Thor Masters մրցաշարին 19 երկրից 165 մասնակից կար։ 7 փառահեղ հանդիպում և մեկ քայլ առաջ»,–լուսանկարին կից գրել է Ջուլֆալակյանը։
Հիշեցնենք, որ 2019–ի նոյեմբերին Մոսկվայում Grand Prix Arlosa 2019 մրցաշարում 77 կգ քաշայինների պայքարում Արսեն Ջուլֆալակյանը պարտություն էր կրել կրկնակի օլիմպիական, աշխարհի և Եվրոպայի քառակի չեմպիոն, Ռուսաստանի հավաքականի ներկայացուցիչ Ռոման Վլասովից:
