Երեկ հատուկ քնչական ծառույությունը «Մարտի 1-ի» գործով հարցաքննության էր կանչել ՀՀ երկրորդ նախագահ  Ռոբերտ  Քոչարյանին, որից հետո նրան մեղադրանք էր առաջադրվել:

Ռոբերտ Քոչարյանը հարցաքննությունից հետո հարցազրույց էր տվել «Երկիր Մեդիա» հեռուստաընկերությանը և իր հասցեին մեղադրանքը որակել քաղաքական վենդետա:

Թեմայի շուրջ Vesti.am-ը զրուցել է քաղաքագետ Արա Պապյանի հետ:

-Պարո՛ն Պապյան,  Քոչարյանը հայտարարեց, որ դրանք հորինված, շինծու, քաղաքական ենթատեքստ ունեցող, իրականության մեջ գոյություն չունեցող մեղադրանքներ են և, որ  «Մարտի 1-ի» գործը անեծք կդառան  մեր ժողովրդի գլխին: Ի՞նչ նկատի ուներ նա:

Երևի նկատի ունի, որ այս գործը պարբերաբար կվերանայվի: Չեմ բացառում, որ այդպես էլ կլինի, սակայն դա ավելի վատ տարբերակ չէ, քան լռության մատնելը: Եթե այս հարցը հնարավորինս անաչառ քննության չենթարկվի, ապա վերքը կմնա ժողովրդի մեջ և քաղաքական առումով ավելի թարախակալում է և լուրջ խնդիրներ է առաջացնում: Քանի որ Քոչարյանը մշտապես հավատացել է մեր արդարադատության համակարգին և իր երեկվա ելույթում էլ պարբերաբար վկայակոչում էր Սահմանադրական դատարանը, հետևաբար, չեմ կարծում, որ ինքը հայաստանյան դատարանների անաչառության վրա կասկածելու առիթ ունի: Ի վերջո, սա վերջնական  որոշում չէ, պարզապես մեղադրանք է: Վճիռը կլինի բազմակողմանի, հուսանք՝ նաև անաչառ քննությունից հետո:

-Քոչարյանը նաև նշում է, որ սա ռումբ է, որը հաստատ պայթելու է և իրավական համակարգն էլ վտանգի տակ է:

Ես այդպես չեմ կարծում: Վերջին շրջանում մենք ամենաանկախ և անաչառ դատարանը հիմա ունենք: Միգուցե ճիշտ չէ ասել, որ բացարձակ անկախ են. կա հասարակական պահանջ ու ազդեցություն, բայց դա բնական է: Աշխարհի որևէ դատարան երբևէ չի կարող գտնվել հասարակական տրամադրություններից դուրս: Այսինքն Քոչարյանի առաջարկը ո՞րն է, որ այս հարցը չքննվի՞: Ի վերջո 10 մարդ է մահացել, հարյուրավորները վնասվածք են ստացել, տուժել ու ձերբակալվել են: Սա լուրջ հարց է: Եվ ասել, որ սա անեծք կդառնա և եկեք ոչինչ չանենք, սխալ է: Սա այսօր առկա միակ տարբերակն է և այսօր դեռևս դատարանը, իսկապես, անկախ է:

-Երկրորդ նախագահը նաև հայտարարեց, որ սա պատերազմող երկրի համար այդքան էլ լավ տարբերակ չէ: Դրանից կարող է օգտվել թշնամի երկիրը, ինչը մենք ժամանակին բազմիցս արել ենք: Նրա խոսքով՝ սրանով նաև հեղինակազրկում ենք բանակը: Ի՞նչ կարող է անել այս դեպքում Ադրբեջանը:

Ադրբեջանը ոչինչ չի կարող անել, քանի որ սա կոնկրետ դատավարության մասին է խոսքը, որը որևէ ազդեցություն չունի բանակի վրա: Այստեղ խոսքը բանակի ղեկավարության և Գերագույն գլխավոր հրամանատարի անօրինական քայերի մասին է,  եթե դատարանը դա ապացուցի: Այսինքն Քոչարյանն արդեն վստահ է, որ դատարանն իրեն մեղավո՞ր է ճանաչելու:

Սա մի կողմից էլ լավ է՝ բանակը մաքրելու առումով: Մեզ այնքան երկար ժամանակ ասում էին՝ վայ-վայ-վայ, վատ բան չխոսեք բանակի մասին, մի խոսեք, որ այնտեղ կաշառակերություն, ծեծ ու ջարդ, բռնաբարություն կա և դրա հետևանքով ամեն ինչ ավելի վատացավ: Կա մի պարզ ճշմարտություն ամբողջ աշխարհում՝ եթե գոյություն ունեն խնդիրներ, դրանք պետք է բարձրաձայնվեն և լուսաբանվեն, քննության ենթարկվեն և լուծում ստանան: Սա որևէ ձևով Հայաստանի անվտանգության հետ կապ չունի: Այնքան երկրների նախագահներ են գնացել, նստել բանտերում իրենց արածների համար: Չիլլի բանակի հրամանատարը դատապարտվեց, ի՞նչ եղավ, դրանից Չիլլիի բանակը թուլացա՞վ: Ինչ վերաբերում է Ադրբեջանին, ապա այնտեղ նման երևույթներ չեն եղել, որ մենք էլ օգտվենք: Այնտեղ նախագահին դատելու խնդիր չի եղել: Այնտեղ  ռազմական հեղաշրջում է եղել, որը նշանակում է, որ բանակի մի մասը մյուսի դեմ է դուրս գալիս: Մենք այստեղ նման երևույթ չունենք: Չեմ կարծում, որ բանակի որևէ մասը կաջակցի Քոչարյանին: Բանակը չեզոք է և այդպես էլ թող մնա: Երբ այստեղ Քոչարյանին դատում են, դրանից բանակը չի կազմալուծվում:

-Հնարավոր համարում ե՞ք, որ Հայաստանի այս ներքին զարգացումների հետ կապված սահմանագծում Ադրբեջանը կակտիվանա և ինչ-որ գործողություններ կիրականացնի:

Ոչ, քանի որ Քոչարյանը որևէ դերակատարում չունի: Բռնենք Քոչարյանին, դատենք 10 հոգու էլ հետը, դրանից ինչ պետք է լինի:

-Քոչարյանի խոսքում ի՞նչ մեսիջներ տեսաք, հատկապես Սերժ Սարգսյանին ուղղված:

Մի շարք մեսիջներ կային: Դրանք ուղղված էին թե՛ Սերժ Սարգսյանին, թե՛ Լևոն Տեր-Պետրոսյանին, և թե՛ կոալիցիոն կուսակցույթուններին՝ եթե գնամ նստեմ, ձեզ էլ հետս եմ տանելու: Այսօր պատահական չէ, որ և՛ ՀՀԿ-ն, և՛ ՀՅԴ-ն արդեն հայտարարությամբ են հանդես եկել, մնաց ՕԵԿ-ը, նրանք էլ կանեն: Այդ կուսակցություններն էին 2008 թվականից  հետո կոալիցիա կազմել: Եթե Քոչարյանի արարքն անօրինական է և դատապարտելի, ապա կուսակցությունները, եթե հանցավոր չեն, ուրեմն հանցակից են: Դրա համար նրանք ամեն ինչ պետք է անեն՝ Քոչարյանի քայլերն արդարացնելու համար:

Դուսյա Ղազարյան

Vesti.am