Կառավարության այսօրվա նիստում վարչապետ Կարեն Կարապետյանն անդրադարձավ արգելանքի հետևանքով մաքսազերծման խոչընդոտների վերացմանը: Նմանատիպ խոչընդոտները կվերացվեն:
«Իրականացված ուսումնասիրությունների արդյունքում վերհանվել են ապրանքների մաքսազերծման խափանման դեպքեր, որոնք պայմանավորված են եղել ֆիզիկական կամ իրավաբանական անձի գույքի վրա արգելանքի առկայությամբ: Նշվածի արդյունքում սահմանափակվում է մաքսազերծման գործընթացը և առցանց ապրանքի օգտագործման կամ տնօրինման հնարավորությունը»,-նշեց նա:
Հաշվի առնելով դա՝ վարչապետն Արդարադատության նախարարին և Պետական եկամուտների կոմիտեի նախագահին հանձնարարեց 20-օրյա ժամկետում համատեղ մշակել և Կառավարության աշխատակազմ ներկայացնել անձի գույքի կամ դրամական միջոցների արգելանքի առկայության դեպքում ապրանքների մաքսազերծման խոչընդոտների վերացմանն ուղղված առաջարկություններ:
«Իրականում անհասկանալի է ... եթե մարդն ապրանք է ներմուծում Հայաստան և հաշվի վրա արգելանք ունի, մենք ինչու ենք նրան սահմանափակում，եթե հնարավորություն կա այդ պարտավորությունները կատարելու համար»,-ասաց նա:
