Կառավարության այսօրվա նիստում վարչապետ Կարեն Կարապետյանն անդրադարձավ հանրապետական գործադիր մարմինների 2017 թվականի գործունեության հաշվետվությանը և 2018 թվականի աշխատանքներին:
«Ներկայումս ներկայացվում են հանրապետական գործադիր մարմինների 2017 թվականին կատարած աշխատանքները, գերակա խնդիրների և միջոցաառումների ծրագրերի իրականացման արդյունքները, ինչպես նաև 2018 թվականի համար նախատեսված միջոցառումները»,-նշեց վարչապետը:
Հաշվի առնելով հանրության հետ հետադարձ կապի և հաշվետվողականության կարևորությունը՝ Կարապետյանը հանրապետական գործադիր մարմինների ղեկավարներին և մարզպետներին հանձնարարեց 20-օրյա ժամկետում՝ ըստ ոլորտի, հանրությանը ներկայացնել 2017 թվականի նախաձեռնած բարեփոխումների և ներդրումային ծրագրերի միջոցառումների և գերակա խնդիրների լուծմանն ուղղված աշխատանքների վերաբերյալ հաշվետվություններ, ինչպես նաև 2018 թվականի համար նախատեսված միջոցառումների ծրագրերը, կատարման հստակ ժամկետները և ակնկալվող արդյունքները:
«Կարծում եմ՝ պարզ ձևակերպված է: Մաքսիմալ թվեր, մաքսիմալ կոնկրետ հաշվետվողականություն»,-ավելացրեց նա:
