Վարչապետ Կարեն Կարապետյանը Կառավարության այսօրվա նիստում անդրադարձավ տոնական օրերին մաքսային ծառայության և առևտրային բանկերի աշխատանքային գրաֆիկ սահմանելուն:
«Իրականացված ուսումնասիրությունները փաստում են, որ տոնական և նախատոնական օրերին կտրուկ ակտիվանում է արտաքին տնտեսական գործունեություն իրականացնող տնտեսվարողոների գործունեությունը, ընդլայնվում են ներմուծման և արտահանման ծավալներն ու հաճախականությունը, ֆիզիկական անձիք առավել հաճախ են հատում մաքսային սահմանը: Այդ իսկ պատճառով անհրաժեշտ է ապահովել տոնական և նախատոնական օրերին արտահանմամբ և ներմուծմամբ զբաղվող գործարարներին և քաղաքացիներին մաքսային մարմնի, ինչպես նաև առևտրային բանկեերի կողմից համապատասխան ծառայությունների մատուցումը, այդ թվում՝ մաքսային սահմանով տեղափոխվող ապրանքների մաքսային ձևակերպումները և ժամանակին, առանց ընդհատումների և պատշաճ մակարդակով կազմակերպումը»,-ասաց նա:
Կարապետյանը Պետական եկամուտների կոմիտեի նախագահին հանձնարարեց, իսկ Կենտրոնական բանկի նախագահին էլ առաջարկեց դեկտեմբերի 2-ից սկսած մինչև հունվար ամսվա տոնական օրերի ավարտը տնտեսվարողոներին մատուցվող մաքսային ծառայությունների անընդհատությունն ու անխափանելիությունն ապահովելու նպատակով շաբաթ-կիրակի և տոնական օրերին բոլոր մաքսատներում, ինչպես նաև առևտրային բանկերում սահմանել աշխատանքների կազմակերպման հերթապահություն՝ նախապես հաստատված աշխատանքային գրաֆիկին համապատասխան:
«Պարո՛ն Երիցյան, ընդունելի է»,-դիմելով Կենտրոնական բանկի փոխնախագահ Ներսես Երիցյանին, ասաց Կարապետյանը:
«Բոլոր բանկերը չէ, ըստ անհրաժեշտության»,-արձագանքեց Երիցյանը:
Vesti.am
