Ինչպես Սոչիից հայտնում է Vesti.am-ի թղթակիցը, Հայաստանի տաղավարն այցելուներին գրավել էր իր յուրօրինակությամբ: Ցուցադրված են եղել ազգային ցուցանմուշներ՝ հագուստներ, խաչքարեր, երկրի զինանշանը, դուդուկ: Հայաստանի տաղավարում այցելուները հնարավորություն են ունեցել համտեսել լավաշ, նուռ և այլ մրգեր: Բացման պահից տաղավարի և Հայաստանի հանդեպ հետաքրքրությունը շատ մեծ է: Շեշտը դրված է այնպիսի ազգային արժեքների արտացոլման վրա, ինչպիսիք են հայոց պատմությունը, մշակույթը, արվեստը և ավանդույթները:
Տաղավարի մոտ գտնվելը յուրահատուկ հնարավորություն է մեր երկիրը ճանաչելու Հայաստան չայցելած հյուրերի համար:
Ռուսաստանի հայերի միության և Համաշխարհային հայկական կոնգրեսի երիտասարդական ասոցիացիաների նախագահ Մարիամ Մարտիրոսյանի խոսքով՝ փորձել են առավելագույնս ներկայացնել Հայաստանը, նրա մշակույթն ու պատմությունը: Հայկական տաղավարում հնչել են հայկական երգեր, մասնակիցները կատարել են հայկական ազգային պարեր։ Եվ սովորեցրել են փառատոնի մյուս երկրների ներկայացուցիչներին մեր երգերն ու պարերը:
Հիշեցնենք, որ փառատոնին մասնակցում են 25 հազար երիտասարդ և ուսանող՝ աշխարհի 180 երկրից: Հայաստանից փառատոնին մասնակցում է 250 մարդ: Հայկական պատվիրակության կազմում է Ռուսաստանի հայերի միության ռուսական հասարակական կազմակերպության հայաստանյան մասնաճյուղի 33 անդամ, որոնց հովանավորել է Ռուսաստանի հայերի միության նախագահ, ՅՈւՆԵՍԿՕ-ի բարի կամքի դեսպան Արա Աբրահամյանը:
https://youtu.be/TuNVeCWlr2s
