«Բասկետբոլի Հայաստանի հավաքականների հաջողությունները պետք է կարևորել ոչ միայն սպորտային առումով, դրանք նաև ապացուցում են, որ Հայաստանում հնարավոր է և խաղային մարզաձևերը զարգացնել և հաջողություններ գրանցել»,- լրագրողների հետ հանդիպմանն ասաց Հայաստանի բասկետբոլի ֆեդերացիայի նախագահ, Սպորտի և երիտասարդյության հարցերի նախարար Հրաչյա Ռոստոմյանը:
Հիշեցնենք, բասկետբոլի Հայաստանի մինչև 16 տարեկան տղաների և աղջիկների հավաքականները Անդորրայում և Ջիբրալթարում կայացած Եվրոպայի C դիվիզիոնի առաջնություններում նվաճել են ոսկե մեդալներ:
«Մեզ մոտ թյուր կարծիք է, որ մենք մենակ ուժեղ ենք մենապայքարային մարզաձևերում, թիմային խաղերում չենք հաջողում, չենք կարողանում համախմբվել: Խաղային մարզաձևերը հնարավոր է Հայաստանում զարգացնել: Պետք են մասնագետներ, ովքեր հասկանում են գործից, սրտացավ են, ամենակարևորը՝ նաև ուշադրություն դարձնել յուրաքանչյուր մանրուքի վրա»,- նշեց Հ. Ռոստոմյանը:
Vesti.am
