«Մենք՝ ռուսասատանյան հասարակության մոսկովյան համաքաղաքային ցույցի մասնակիցներս, Օսմանյան Թուրքիայում Հայոց ցեղասպանության զոհերի հիշատակի օրը հայտարարում ենք.
Մենք հիշում և հարգանքի տուրք ենք մատուցում 20-րդ դարի առաջին ցեղասպանության անմեղ զոհերի հիշատակին, ցեղասպանություն, որն իրականացվել է Օսմանյան Թուրքիայում հայերի նկատմամբ:
Մենք շնորհակալ ենք բոլոր այն ազգերին, պետություններին և միջազգային կազմակերպություններին, որոնք ճանաչել և դատապարտել են Հայոց ցեղասպանությունը՝ որակելով այն մարդկության դեմ իրականացված դաժան հանցագործություն և այսօր էլ շարունակում են պահպանել արդարության և մարդասիրության իդեալները:
Մենք հիշում ենք, որ Ռուսաստանն առաջին երկրներից էր, որ հայ ժողովրդի նկատմամբ վայրագությունները դատապարտեց 1915 թվականի դաշնակից երկրների համատեղ Հռչակագրով: Հիշում ենք, որ ՌԴ նախագահ Վլադիմիր Պուտինը Երևանում մասնակցեց Հայոց ցեղասպանության 100-րդ տարելիցին նվիրված միջոցառումներին:
Մենք պահանջում ենք Թուրքիայի այսօրվա իշխանություններից դեմ առ դեմ կանգնել սեփական պատմությանը, ճանաչել, ապաշխարել և դատապարտել Հայոց ցեղասպանությունը:
Կարծում ենք, որ այսօր, երբ Մերձավոր Արևելքում քրիստոնյանների համար դարձյալ մեծ սպառնալիքներ են առաջացել, Հայոց ցեղասպանության ճանաչումը միջազգային հանրության կողմից ժողովուրդների և պետությունների պատվի հարց է: Եվ հենց Հայոց ցեղասպանության կազմակերպիչների և ներկայիս նրանց հետևորդների հրապարակային դատապարտումը ոչ միայն կվերականգնի պատմական արդարությունը, այլև կկանխի նմանատիպ հանցագործության կրկնությունը:
Միայն միասին, հենվելով հայ-ռուսական բարեկամության ամուր հիմքերի վրա, մենք կարող ենք դիմակայել արդի սպառնալիքներին ու մարտահրավերներին՝ հակահարված տալով հանցագործներին և ահաբեկիչներին»,-նշված է Ռուսաստանի հայերի միության տարածած հաղորդագրության մեջ:
