Ռուսաստանի նախագահ Վլադիմիր Պուտինի հետ բանակցություններից հետո Հունգարիայի վարչապետ Վիկտոր Օրբանը Կրեմլի դիմաց գտնվող «Ժիվագո» ռեստորանում ճաշել է ռուսական խոհանոցի ուտեստներով, հաղորդում է «ՌԻԱ Նովոստի»-ն։
Ռեստորանը գտնվում է Մոխովայա և Տվերսկայա փողոցների անկյունում, «Նացիոնալ» հյուրանոցի շենքում։
«Օրբանը «Ժիվագո» ռեստորանում մեծ հաճույքով փորձել է կարմիր խավիարով նրբաբլիթներ, խոզի ճարպը (սալո) կաշվի մեջ. ռեստորանում սալոն պատրաստում են իրենք՝ նախապես խոզի միսը եփելով սոխի թեփի մեջ։ Նաև՝ թթու դրած բանջարեղեն, սիբիրյան պելմենիներ, որոնց բաղադրության մեջ մտնում են տավարի միս, խոզի միս, ճագար, սոխ, կարագ, սև պղպեղ, ինչպես նաև մոսկովյան բորշչ», – «ՌԻԱ Նովոստի»-ին հայտնել են ռեստորանից։
Նրանք հավելել են, որ ռեստորանն այդ պահին հատուկ սպասարկման համար փակ չի եղել, չնայած Օրբանը մեծ պատվիրակության հետ է եղել։ Հյուրերը ճանաչել են նրան և անհամբերությամբ լուսանկարվել նրա հետ։
Պուտինը և Օրբանը հանդիպել են ուրբաթ օրը։ Կրեմլում բանակցությունները տևել են գրեթե չորս ժամ։
Հունգարիայի վարչապետը Մոսկվա մեկնելուց առաջ հայտնել էր, որ այդ բանակցությունների նպատակն է շարունակել Հունգարիայի էներգակիրներով ապահովումը, որպեսզի երկիրը խողովակաշարերով գազ և նավթ ստանա Ռուսաստանից։ Նա ընդգծել էր, որ ռուսական նավթի և գազի մատակարարումներն ապահովել են Հունգարիայի համար Եվրոպայում էներգակիրների ամենացածր գները։
Տեղի ունեցած հանդիպման ընթացքում Պուտինը Ռուսաստանի և Հունգարիայի միջև էներգետիկայի ոլորտում համագործակցությունը որակել է որպես «շատ լավ»։ Ինչ վերաբերում է երկու երկրների առևտրատնտեսական համագործակցությանը, ռուսական առաջնորդը փաստել է, որ 2024 թվականին ապրանքաշրջանառության նվազում է գրանցվել, ինչը պայմանավորված է եղել, առաջին հերթին, արտաքին սահմանափակումներով։ Միևնույն ժամանակ, Ռուսաստանի նախագահը մատնանշել է համագործակցության լավ հեռանկարները՝ հավելելով, որ 2025 թվականին նկատվում է փոխադարձ առևտրի որոշակի աճ՝ մոտ 7%։
