ԱՄՆ նախագահ Դոնալդ Թրամփը հայտարարել է, որ անվավեր է ճանաչում իր նախորդ Ջո Բայդենի կողմից ստորագրված բոլոր գործադիր հրամանները և փաստաթղթերը, որոնք ստորագրվել են «ավտոգրիչի» օգտագործմամբ։
«Քնկոտ Ջո Բայդենի կողմից ավտոգրիչի միջոցով ստորագրված ցանկացած փաստաթուղթ, իսկ դրանք մոտավորապես 92%-ն էին, սույնով չեղյալ է հայտարարվում և այլևս չունի իրավական ուժ։ Ավտոգրիչի օգտագործումն արգելված է, եթե Միացյալ Նահանգների նախագահը կոնկրետ թույլտվություն չի տվել դրա համար։ Արմատական ձախակողմյան խելագարները, որոնք շրջապատել էին Բայդենին Օվալաձև գրասենյակի գեղեցիկ «Ռեզոլյուտ» գրասեղանի շուրջը, նրանից խլել են նախագահի պաշտոնը։
Սույնով ես չեղյալ եմ հայտարարում բոլոր գործադիր հրամանները և մնացած ամենը, ինչը անմիջապես չի ստորագրվել Խաբեբա Ջո Բայդենի կողմից, քանի որ այն մարդիկ, ովքեր կառավարում էին ավտոգրիչը, դա արել են ապօրինի։ Ջո Բայդենը մասնակցություն չի ունեցել ինքնաստուգման գործընթացին և եթե նա հայտարարի, որ մասնակցել է, նրան կներկայացվի կեղծ վկայություն տալու մեղադրանք։ Շնորհակալություն այս հարցին ձեր ուշադրության համար»։ ԱՄՆ նախագահը գրել է այս մասին Truth Social սոցիալական ցանցում։
Ավելի վաղ The Washington Post թերթը գրել էր, որ ԱՄՆ Կոնգրեսի Ներկայացուցիչների պալատի Վերահսկողության կոմիտեն կասկածներ է հայտնել նախկին նախագահ Ջո Բայդենի՝ ավտոգրիչով ստորագրված մի քանի հրամանների օրինականության վերաբերյալ։ Կոնգրեսականները Արդարադատության նախարարությանը խնդրել էին անցկացնել նոր հետաքննություն։
Հետաքննության պատճառը եղել են ներկայիս Սպիտակ տան տեր Դոնալդ Թրամփի և նրա դաշնակիցների կողմից Բայդենի վարչակազմի աշխատակիցների նկատմամբ առաջադրված մեղադրանքները. նրանք, իբր, չարաշահել են Բայդենի առողջական վիճակի վատթարացումը և օգտագործել են ավտոգրիչը՝ հրամանագրերը առանց նախկին նախագահի իմացության ստորագրելու համար։
Զեկույցում պնդվում է, որ կոնգրեսականները չեն կարողացել գտնել ապացույցներ այն մասին, որ Բայդենը հավանություն է տվել մի քանի հրամանների ստորագրմանը, ներառյալ դատապարտյալներին ներում շնորհելու վերաբերյալ հարցերը։ Նրանք նաև նշում են, որ քանի դեռ Բայդենի նախկին վարչակազմի անդամները չեն ապացուցել, որ նա հավանություն է տվել այդ փաստաթղթերին, կոմիտեն «ավտոգրիչով լիազորված այդ գործողությունները համարում է իրավաբանորեն անվավեր», իսկ հրամաններն իրենք համարել են ոչ լեգիտիմ։
