Ադրբեջանի նախագահ Իլհամ Ալիևը հայտարարել է, որ միջազգային իրավունքն այսօր չի գործում, գերակա է մնում ուժի գործոնը, և Ադրբեջանը շարունակելու է հզորացնել իր ռազմական ներուժը։
«Առաջնային է մնում ուժի գործոնը։ Այն առաջիկայում ևս գերակա է լինելու աշխարհում, նորագույն պատմությունը դա է ցույց տալիս։ Ես արդեն ասել եմ, որ միջազգային իրավունքը չի գործում։ Մենք պետք է ինքնախաբեությամբ չզբաղվենք, պետք է ավելի ուժեղանանք, հզորացնենք մեր ռազմական ներուժը։ Անհրաժեշտության դեպքում թշնամուն պետք է քշենք «մեր տարածքներից»՝ ուժով։ Ես ասել եմ այդ մասին և արել եմ», - հայտարարել է Ալիևը։
Նա նշել է նաև, որ արտաքին աշխարհին թույլ չի տա խառնվել Ադրբեջանի «ներքին գործերին»։
«2020 թվականի պատերազմից հետո մենք նոր զորամիավորումներ ենք հիմնել, նոր զինտեխնիկա ենք գնել, շարունակելու ենք առաջ շարժվել այդ ուղղությամբ, քանի որ եթե ուժեղ չլինենք, չենք կարող ապրել այնպես, ինչպես ցանկանում ենք։ Մենք ուզում ենք ազատ ապրել, որ ոչ ոք այլևս չմիջամտի մեր գործերին։ Դրա կարիքը չկա։ Թող ոչ ոք չգա ու չսովորեցնի մեզ, խորհուրդներ չտա, դրա կարիքը չունենք», - ասել է Ալիևը։
Աղբյուրը՝ Aysor.am
