Քննություն է կատարվում՝ «Երազ» այգու տարածքում գործող զիփլայնից քաղաքացու վայր ընկնելու և մահվան դեպքի հանգամանքները պարզելու ուղղությամբ։
Հիշեցնենք, որ shamshyan.com-ը հաղորդել էր, որ «Երազ» այգում ապրիլի 10-ին, ժամը 18։50-ի սահմաններում քաղաքացին 7 մետր բարձրություն ունեցող ճախրուղուց (զիփլայնից) վայր է ընկել։
Դեպի վերաբերյալ մանրամասներ է հայտնել տուժածի քույրը՝ Տաթևիկ Աբրահամյանը, նշելով, որ մահացածը հենց զիփլայնի տնօրենն է, ընդ որում՝ նա մահացել է ոչ թե անվտանգության խնդիրների պատճառով, այլ ընկել է տնակի վրայից՝ 7 մետր բարձրությունից՝ հաճախորդի մեղքով.
«Մեկը մյուսի հետևից կայքերը տեղադրեցին Երազի այգու զիպլայնում այսօր տեղի ունեցած դժբախտ պատահարը: Հոգուս ցավն անբացատրելի է. մահացածը եղբայրս է, ու թեև սիրտ ու տրամադրություն չունեմ մանրամասնություններ գրելու, բայց անտարբեր չեմ էլ կարող անցնել այն մեկնաբանությունների կողքով, որոնք գրում են: Հայտնում եմ, որ եղբայրս այդ զիպլայնի տնօրենն էր ու մահացել է ոչ թե որևէ անվտանգության խնդիրի պատճառով, այլ տնակի վրայից՝ 7 մետր բարձրությունից, ընկել է հաճախորդի մեղքով»,-գրել է Տաթևիկ Աբրահամյանը։
